Annan vergader met Siriese president ná slagting

2012-05-29 23:05

Beiroet – Kofi Annan, die internasionale bemiddelaar vir Sirië, het met die land se president vergader nadat meer as 100 mense in Houla, sentraal-Sirië, vermoor is.

Volgens die VN is altesaam 108 mense dood in die massamoord, waaronder 49 kinders en 34 vrouens. Sommige van die slagoffers het koeëlwonde deur hul koppe gehad.

Annan het Maandag na Damaskus gevlieg vir vergaderings met Assad en ander senior beamptes.

Sirië se staatnuusagentskap het gesê Annan ontmoet Assad Dinsdag, maar het nie verdere besonderhede bekendgemaak nie.

Volgens aktiviste is meer as 13 000 mense sedert Maart 2011 in Sirië dood.

Die Houla-moorde het nuwe aandag op die Siriese konflik gevestig, gedeeltelik weens die brutaliteit daarvan.

Assad se bewind het enige rol in die moorde ontken en dit op "gewapende terroriste" blameer.

– Volg Nuus24 op Twitter.

- AP