Angs oor kernramp kring verder uit
2011-03-25 08:46
Kaapstad - Mense is angstig, ontredderd, baie onseker en niemand weet presies wat aangaan by die Fukusjima-kernkragaanleg nie weens teenstrydige inligting wat uit alle oorde kom.
Só vertel dr. Stéphan van der Watt, lid van die NG Kerk se Missie Japan, oor die situasie in dié geknelde land.
Daar word selfs gerugte versprei dat mense reënjasse en sambrele moet gebruik om hulle teen kernbestraling te beskerm.
Hy is saam met sy vrou, Carina, en hul twee kinders, asook sy skoonouers, ds. Tobie en Annalie de Wet, in To¬kusjima op Sjikoku, die kleinste van die vier hoofeilande van Japan.
Nog ’n Suid-Afrikaanse egpaar, Gys en Linda Olivier, is saam met hulle.
Van der Watt het Donderdag gesê selfs mense in China tref voorsorg vir ’n ramp soortgelyk aan dié van Tsjernobil. Mense koop water, blikkieskos, watersuiweringstablette en selfs draagbare toilette.
Die mense van Missie Japan is nie tans in die gebied wat direk deur die gevaar van bestraling bedreig word nie. Hulle is onseker oor die uitwerking wat dit op kos het, veral op kos wat uit die noorde kom.
“Reuse-vismarkte in Tokio het Woensdag vir die eerste keer in menseheugenis feitlik tot stilstand gekom omdat die mense bang is die vis is besmet en omdat die impak op die visbedryf in die noorde so verwoestend was,” het Van der Watt gesê.
Hul kosvoorraad is nog genoeg en die elektrisiteitvoorsiening ook. Maar hulle het besluit om bottelwater te gebruik.
Intussen het die Japanse regering gesê kraanwater by ’n aanleg in Tokio wat 13 miljoen mense bedien, het radioaktiewe jodium bevat. Dié vlakke is te hoog vir kleuters, maar steeds geskik vir volwassenes se gebruik.
Indien mense aan baie hoë dosisse blootgestel word, kan stabiele jodium aan hulle gegee word om weefselskade te keer deurdat dit die opname van die radioaktiewe jodium-isotope voorkom.
- Die Burger
