Amerikaanse owerhede waaksaam, versigtig
2011-09-10 23:13
Washington – Amerikaanse intelligensiedienste het geen bewyse gevind dat Al-Kaïda daarin geslaag het om enige terroriste binne die VSA te ontplooi om terreuraanvalle uit te voer op die 10de herdenking van die 9/11-aanvalle op New York nie, het senior amptenare Saterdag gesê.
Owerhede is egter steeds waaksaam terwyl die soektog voortduur na enige tekens dat 'n aanval moontlik beplan is om met herdenkingsgebeure Sondag in Washington of New York saam te val.
Amptenare het sedert Woensdag 'n wenk opgevolg dat Al-Kaïda moontlik drie mans na die VSA gestuur het om 'n aanval met 'n motorbom in een van dié twee stede uit te voer.
Volgens die wenk kon minstens twee van dié mans Amerikaanse burgers wees.
Teen Saterdag kon geen spoor van 'n moontlike komplot egter gevind word nie.
Hoewel dié soort wenke gereeld aan intelligensiedienste gestuur word, is baie aandag aan dié spesifieke wenk gegee omdat dit verband hou met die 9/11-aanvalle, die ergste terreuraanvalle in die geskiedenis in die VSA.
Asst-dir. James McJunkin van die FBI in Washington het die reaksie op die wenk as normaal beskryf.
"Ons aanvaar ons gaan meer bedreigings en ondersoekaktiwiteit hê rondom hoë-profiel-datums en -geleenthede," het hy gesê. "Hierdie is vir ons 'n normale reaksie."
– Volg Nuus24 op Twitter.
- AP