Amerikaanse medici vas weens bedrog
2011-09-08 11:20
Washington – Altesaam 91 mense, waaronder dokters en ander mediese deskundiges, word daarvan aangekla dat hulle aan bedrogskemas deelgeneem het.
Die bedrog behels $295 miljoen se bedrieglike eise aan die federale Medicare-program. Medicare is ‘n gesondheidsversekeringsprogram wat deur die VSA se regering geadministreer word.
Die advokaat-generaal Eric Holder en Kathleen Sebelius, sekretaris van gesondheidsdienste, sê 91 mense is in totaal aangekla. Klagte is van oor die land heen ingedien.
Holder het op ‘n mediakonferensie gesê die mense wat vasgetrek is, is besig om die “integriteit van ons gesondheid-sorgstelsel in gevaar te stel.”
Sebelius sê die inhegtenisnemings is ‘n “waarskuwing aan diegene wat probeer om belastingsbetalers en Medicare-begunstigdes te bedrieg.”
Elf van die mense wat in hegtenis geneem is, is dokters. Drie van hulle was verpleegsters en tien was gelisensieerde gesondheidspraktisyns.
Een van die gevalle betrek ‘n dokter, ‘n verpleegster en vyf ander medesamesweerders in Baton Rouge in die Amerikaanse deelstaat Louisiana. Die groep is in hegtenis geneem nadat hulle meer as $19 miljoen by Medicare geëis het.
Die eise was vir gespesialiseerde verpleegkunde en ander dienste wat onnodig of nooit voorsien was nie.
Volg Nuus24 op Twitter.
- Sapa - AP