Amerika moet ingryp by Gasa-geweld – Egipte

2012-11-15 16:47

Kaïro – Egipte het vir Amerika gevra om druk op Israel te sit om hul aanvalle op Hamas-militante stop te sit en het gewaarsku dat die geweld kan vererger.

Mohammed Kamel Amr, minister van buitelandse sake, het Woensdagaand met sy Amerikaanse eweknie, Hillary Clinton, gesels en gevra dat Amerika dadelik moet ingryp om Israel se aggressie stop te sit.

Die oproep het plaasgevind na Egipte sy ambassadeur in Israel herroep het.

Israel se lugmag het die afgelope week verskeie aanvalle op die Gasa-strook uitgevoer in reaksie op Palestynse aanvalle op die suide van Israel.

Die militêre leier van Hamas, die Palestynse groep wat die Gasastrook beheer, is ook Woensdagaand in 'n Israelse missielaanval dood

Amr het aan Clinton gesê dat as Israel nie stop nie, sal die situasie buite beheer raak. Hy het gevra dat Amerika hul goeie bande met Israel moet gebruik.

President Barack Obama het Woensdag met Egipte se president Mohammed Morsi en Israel se premier Benjamin Netanyahu gepraat en sy ondersteuning vir Israel aangekondig.

– Volg Nuus24 op Twitter
 

- AP