Amerika, Libië verskil oor aanval op konsulaat
2012-09-17 10:20
Washington – Topbeamptes van Amerika en Libië het verskillende weergawes oor die aanval op die Amerikaanse konsulaat in Benghazi gegee waarin die ambassadeur en drie ander Amerikaners dood is.
Susan Rice, die Amerikaanse ambassadeur vir die Verenigde Nasies, het Sondag gesê dit het begin met 'n spontane betoging oor 'n video wat glo beledigend teenoor Islam is, waarna die Amerikaanse ambassade aangeval is.
"Mense het buite die ambassade (konsulaat) bymekaargekom en dit het gewelddadig geraak. Diegene wat met ekstremiste verbind word het daarna met swaar wapens aangesluit, waarna dit buite beheer geraak het," het Rice aan Fox News Sunday gesê.
"In dié stadium sien ons nie tekens dat dit 'n gekoördineerde plan of 'n vooraf beplande aanval was nie. Natuurlik sal ons vir die uitslae van die FBI se ondersoek wag, en ons wil nie voor dan gevolgtrekkings maak nie.
Met die aankondiging van die 50 verdagtes wat in hegtenis geneem is, het Libië se parlementshoof die aanval egter op 'n groep buitelandse ekstremiste blameer wat Libië van Mali en Algerië binnegekom, en die aanval met plaaslike geaffilieerdes beplan het.
"Die manier hoe die skuldiges opgetree en beweeg het... laat ons met geen twyfel dat dit vooraf beplan is nie," het Mohammed al-Megaryef, president van die Libiese Nasionale Kongres, aan CBS News gesê.
"Dit is beplan, definitief, dit was deur buitelanders beplan, mense wat die land 'n paar maande gelede binnegekom het."
Die ambassadeur, Chris Stevens, het glo weens rookinaseming gesterf nadat hy in die brandende konsulaat vasgekeer was.
Al-Kaïda in die Arabiese Skiereiland – die Jemen-gebaseerde tak van dié bekende terreurnetwerk – beweer die aanval was uit weerwraak vir die moord op die terreurnetwerk se adjunkleier, Sheikh Abu Yahya al-Libi. Daar is egter nie bewyse om dié bewering te staaf nie.
– Volg Nuus24 op Twitter.
- AFP
