‘Allahu Akbar’ voor glo 13 doodskiet
2009-11-07 06:38
Fort Hood (Texas).–’n Amerikaanse leër-psigiater wat 13 medesoldate doodgeskiet het, het glo “Allahu Akbar” (“God is groot” in Arabies) geskree voordat hy losgebrand het.
Maj. Nidal Malik Hasan (39), wie se ouers van Midde-Oosterse afkoms was, het eergistermiddag ook 30 mense gewond in die grootste skietvoorval nóg in ’n Amerikaanse weermagbasis. Fort Hood, die grootste basis in die VSA, is sedertdien heeltemal gesluit.
Ooggetuies het gesê Hasan het dié woorde geuiter, maar sy bevelvoerder, lt.genl. Robert Cone, het gister gesê dit kon nog nie bevestig word nie.
Daar is aanvanklik vermoed dat Hasan ook in die skietery dood is, maar dit het later aan die lig gekom hy is gewond. Hy het oënskynlik twee handwapens by hom gehad.
Owerhede ondersoek tans of Hasan se wapens behoorlik by die leër geregistreer was.
Volgens Cone is Hasan in ’n stabiele toestand in ’n hospitaal en hoop ondersoekers om hom so gou moontlik te ondervra.
Hy het eergisteroggend, kort voor die skietery, nog in ’n winkel in die basis vir hom ontbyt gekoop. Kringtelevisiebeelde van sy besoek aan die winkel is gister opgespoor.
Die motief vir die skietery is nog onduidelik, maar Hasan sou klaarblyklik binnekort in Irak ontplooi word.
Sen. Kay Bailey Hutchison, ’n Republikein van Texas, het gesê generaals by Fort Hood het haar meegedeel Hasan sou spoedig oorsee ontplooi word.
Hoewel hy blykbaar ’n stil mens is, het hy al volgens kollegas sy teenkanting van die VSA se betrokkenheid by die oorloë in Irak en Afganistan uitgespreek.
’n Imam verbonde aan ’n moskee waar Hasan–’n lewenslange Moslem–gereeld aanbid het, het hom as ’n toegewyde soldaat bestempel wat geen teken van ekstremisme getoon het nie en gereeld in sy uniform kom bid het.
Sy tante, me. Noel Hasan van Falls Church, Virginia, het egter aan The Washington Post gesê hy is baie getreiter omdat hy ’n Moslem is – veral sedert 9/11.
“Sommige mense kan dit vat en ander nie. Hy moes alles aanhoor en het later besluit hy wil uit die leër.”
Die leër kon egter nie bevestig dat hy om ontslag aansoek gedoen het nie.
Hy het direk na skool by die leër aangesluit en het sy kwalifikasies aan weermaginstellings behaal. Hy is sedert verlede jaar ’n psigiater in voorkomende en rampsielkunde.
Cone het erken dat dit “nie sin maak nie” dat ’n enkele skieter soveel mense kan doodskiet of beseer, maar het bygevoeg dat die skietery op “kort afstand” plaasgevind het.
“Opslagskoeëls het hom in staat gestel om soveel mense te beseer.”
Amptenare sluit ook nie die moontlikheid uit nie dat talle slagoffers gesterf het toe hul makkers in die chaos skote afgevuur het om Hasan te keer. Skote is die eerste keer omstreeks 13:00 gehoor by die soldategereedheidsentrum, waar soldate wat ontplooi word of terugkeer mediese ondersoeke ondergaan.
- Sapa-AP