Al-Kaïda sorg vir bloedige naweek in Bagdad

2013-02-18 08:25

Bagdad – Minstens 21 mense is dood in ‘n rits bomontploffings in hoofsaaklik Sjiïtiese gebiede van Bagdad, het beamptes gesê.

Drie motorbomme het Sondag in die Sadr Stad- infomele nedersetting, noord van die stad, ontplof, terwyl motorbomme ook in Ameen, Al-Husseiniyah en Kamaliyah in die ooste afgegaan het, het nooddiens- en sekuriteitswerkers gesê.

Bomme het ook langs die pad in Karrada in sentraal-Bagdad en in Saidiyag in die suide van die hoofstad ontplof, het hulle bevestig.

Minstens 21 mense is dood en meer as 120 is in die aanvalle gewond, het die beamptes gesê.

Al-Kaïda se hoofgroep in Irak het verantwoordelikheid vir die aanvalle aanvaar.

Die Islamic State of Iraq (ISI) het gesê dit is ‘n wraakaanval vir vermeende kriminele dade deur die Sjiïtiese regering in Sunni-dele van die hoofstad.

– Volg Nuus24 op Twitter

 

- Sapa - AFP