Agt verkluim, sewe vermis ná vissersboot sink

2013-01-28 14:08

Moskou – Minstens agt mense is dood en nog sewe word vermis nadat ‘n vissersboot met Russiese en Indonesiese bemanningslede aan boord in yskoue water naby die ooste van Rusland gesink het, het ondersoekbeamptes Maandag gesê.

Oorlewendes het reeds aan ondersoekbeamptes in die streek gesê dat agt matrose doodgevries het in die reddingsbootjie. Hul lyke is oorboord gegooi.

Die 30 bemanningslede aan boord die Chance 101 – 19 Russe en 11 Indonesiërs – het in die reddingsbote probeer vlug nadat ‘n reuse-brander die boot getref het. Hulle was sowat 50 km van die kus toe die voorval plaasgevind het.

“Agtien mense was op die een lewensboot en agt van hulle is dood aan hipotermie. Die slagoffers se lyke is oorboord gegooi,” het Natalya Salkina, ‘n woordvoerder, gesê.

Die inligting kom van die oorlewendes, het sy gesê.

Altesaam 10 oorlewendes is deur ‘n Russiese vragskip op een reddingsboot gevind en na die eiland Sakhalin geneem.

Vyf oorlewendes op ‘n ander reddingsboot is deur ‘n vistreiler opgepik.

Die soektog na sewe vermiste bemanningslede duur voort.

– Volg Nuus24 op Twitter

- Sapa - AFP