Agt dood in ontploffing by Pakistanse myn

2013-01-28 12:57

Quetta – Agt Pakistanse mynwerkers is Maandag dood in ‘n gasontploffing by ‘n steenkoolmyn in die suidweste van die land, het ‘n beampte gesê.

Die ongeluk het in die Loralai-streek, sowat 600 km suidwes van Islamabad, in die Baluchistan-provinsie plaasgevind. Dié streek is ryk is aan gas, olie en minerale.

“Die ongeluk het as gevolg van metaangas plaasgevind. Agt werkers is op die toneel dood en twee ander is na ‘n hospitaal geneem nadat hulle gered is,” het Mohammad Iftikhar, die provinsie se hoofinspekteur van myne, gesê.

Sowat 200 mynwerkers het meer as 600 meter ondergrond gewerk toe die ongeluk plaasgevind het, het hy gesê.

Myne in Pakistan is bekend vir swak veiligheidstandaarde en ventilasie.

– Volg Nuus24 op Twitter
 

- Sapa - AFP