Afganistan is slegste plek vir ma’s, kinders
2011-05-08 08:31
Johannesburg – Waar in die wêreld is die beste en slegste plekke om “mamma” te wees?
Volgens die Save the Children-organisasie se 12de Moeder-indeks wat Dinsdag uitgereik is, beklee Noorweë en Afganistan vanjaar onderskeidelik die eerste en laaste plek.
Die studie bepaal jaarliks die welstand van ma’s en hul kroos in 164 lande deur hul gesondheid, opvoeding en ekonomiese omstandighede te monitor.
Suid-Afrika beklee uit 74 lande die 19de plek in die groep vir minder ontwikkelde lande.
Noorweë se ma’s beklee die topplek met van die laagste ma- en kindersterftesyfers ter wêreld, ’n hoë lewensverwagting, goeie opvoeding en gemiddelde kraamverlof van sowat ’n jaar.
In skreiende teenstelling hiermee is Afganistan die goorste plek in die wêreld om kinders groot te maak.
Ma’s en kinders moet hier in “haglike toestande” leef waarin een uit elke ses kinders voor die ouderdom van vyf jaar sterf, een uit drie aan wanvoeding ly
en nege uit tien vroue ’n kind verloor.
“Teen dié agtergrond is dit heel moontlik dat elke ma in Afganistan ’n kind kan verloor,” lui die verslag.
In Noorweë staan net een uit elke 175 ma’s ’n kind voor die ouderdom van vyf aan die dood af.
Bykans die helfte van die bevolking in die ergste lande om kinders in groot te maak het nie toegang tot skoon water nie en net vier meisies vir elke vyf seuns gaan laerskool toe.
Volgens die verslag kom die meeste ander lande in Afrika suid van die Sahara redelik laag op die lys voor.
Suid-Afrikaanse vroue word onder die top-20 gelys uit 80 minder ontwikkelde lande en vir die kinders is dit 53ste uit 81 lande.
In Noorweë is “opgeleide gesondheidspersoneel by byna elke geboorte betrokke”, terwyl dieselfde van slegs 14% van die geboortes in die ongenaakbare Afganistan gesê kan word.
Die gemiddelde lewensverwagting van ’n vrou in Noorweë is 83 jaar, 53 in Suid-Afrika en 45 in Afganistan.
Meer as agt uit elke tien Noorweegse vroue gebruik ’n moderne metode van voorbehoeding teenoor die minder as 16% in Afganistan.
Duitsland, Spanje en Brittanje het net buite die top-tien in die indeks geval, met Amerika 31ste, net bo Luxemburg en Belarus.
Die top-vyf plekke om ’n ma te wees:
1. Noorweë
2. Australië
3. Ysland
4. Swede
5. Denemarke
Die vyf slegste plekke om ’n ma te wees:
1. Afganistan
2. Niger
3. Guinee-Bissau
4. Jemen
5. Tsjad
Volg Nuus24 op Twitter
- Rapport