Afganistan: Geskok oor uitgelekte dokumente
2010-07-27 01:35
Kaapstad – Die regering in Afganistan het Maandag gesê hulle is geskok nadat duisende Amerikaanse militêre en diplomatiese verslae oor die oorlog in Afganistan uitgelek het.
Die dokumente is vroeër deur ‘n fluitjieblaser op ‘n webwerf geplaas.
“Die Afgaanse regering is geskok oor die verslae wat die werklikheid van die Afgan-oorlog ontbloot het,” het Siamak Herawi, ‘n regeringswoordvoerder gesê.
WikiLeaks.org, ‘n webwerf vir fluitjieblasers, het Sondag meer as 90 000 verslae oor Afganistan vanaf 2004 tot Januarie vanjaar gepubliseer.
Die verslae bevat besonderhede oor die oorlog, die aantal lede wat vermoor is, sterfgevalle en ook dreigemente, het Julian Assange, stigter van die webwerf gesê.
“Dit bevat die totale geskiedenis van die Afgaanse oorlog vanaf 2004 tot 2010,” het Assange gesê.
CNN het egter nog nie die egtheid van die dokumente bevestig nie.
Die departement van verdediging wil nog nie kommentaar lewer totdat die Pentagon die dokumente deurgegaan het nie.
- Vir die volledige storie besoek CNN.
- Volg Nuus24 op Twitter.