Aardbewing veroorsaak modderstortings in Asië
2011-09-20 09:09
Guwahati - Reddingswerkers moes in stortreën deur modderstortings in die Himalaja-gebergte na oorlewendes soek nadat ’n aardbewing van 6,9-sterkte Sondag 63 lewens in Indië, Nepal en die Chinese streek van Tibet geëis het.
Meer as 100 mense is beseer. Soldate en polisiebeamptes het Maandag nog oorlewendes uit die puin gehaal.
Die episentrum van die aardbewing was ’n afgeleë gebied op die grens van die noordoostelike Indiese staat Sikkim en Nepal. Die skudding is ook in Bangladesj en Bhoetan gevoel.
Lugmaghelikopters het voorraad na afgeleë dorpies tussen van die hoogste pieke ter wêreld geneem. “Die aardbewing het die hange van heuwels laat loskom en as dit reën, veroorsaak dit grondstortings. Die situasie is dus nog baie gevaarlik,” het Deepak Pandey, woordvoerder van die grenspolisie op die grens tussen Indië en Tibet, gesê.
“Ons het (sedert Sondagaand) meer as 400 mense gered.”
Dit kan dae neem om die finale ongevalle- en sterftesyfer vas te stel, maar die grenspolisie meen dit sal nie skerp styg nie. Inwoners in die grootste stad in Sikkim, Gangtok, het met sambrele in stortreën langs paaie gesit en reggemaak vir nog ’n koue nag. Hulle wou nie terugkeer huis toe nie uit vrees vir naskokke.
“Ons vrees naskokke. Ons het nêrens om heen te gaan nie. Ons huise is beskadig en ons kan nou net op God vertrou,” het Sushma Sharmka, ’n ma van drie, gesê.
Dit reën al vier dae onophoudelik in dele van Sikkim. Honderde plaaslike en buitelandse toeriste was weens die aardbewing ure lank op die hoofpad uit die Indiese staat, Wes-Bengale, gestrand.
In Nepal is minstens agt mense dood – onder wie drie toe die muur van die Britse ambassade in Katmandoe op ’n motor en motorfiets geval het.
In Tibet is sewe mense dood en honderde dakloos gelaat, het die Chinese nuusagentskap Xinhau berig. China het meer as 1 000 soldate na dié Chinese streek gestuur om met reddingsoperasies te help. – Reuters
Volg Nuus24 op Twitter.
- Die Burger