Aardbewing vee talle geboue plat
2011-10-24 09:58
Van – Die krete van vasgekeerde slagoffers van ’n kragtige aardbewing in die suidooste van Turkye het vanuit die puin van ineengestorte geboue opgeklink, het oorlewendes gister vertel.
Teen druktyd is 85 sterfgevalle bevestig toe ’n 7,2-sterkte aardbewing die gebied gister getref het. Na raming kan die dodetal tot meer as ’n duisend styg.
“Die gebou voor my het ineengestort. Ons het na die gebou gestorm en twee beseerdes gered,” het ’n inwoner van die stad Van vertel. “Ons het ’n geroep en gekreun onder die puin gehoor terwyl ons vir die reddingspanne gewag het.”
Noodwerkers het gespook om vasgekeerdes te red uit geboue hier en in omliggende gebiede aan die oewers van die Van-meer, naby Turkye se grens met Iran.
Die burgemeester van die streek, Zulfukar Arapoglu, het aan die uitsaaier NTV gesê: “Talle geboue het ineengestort, talle mense is dood, maar ons weet nie hoeveel nie. Ons wag op noodbystand – dis uiters dringend.”
Die skudding het die stad in die middaguur geruk, het die hoofbestuurder van die Kandilli-sterrewag, Mustafa Erdik, gesê. “Ons raam honderde geboue is beskadig en honderde mense is dood.”
Nog sowat 30 geboue elders in die streek is in puin gelê en 30 mense is dood in meer as 20 naskokke, is berig.– Reuters
– Die Burger
– Volg Nuus24 op Twitter.
- Reuters