81 Sterf in Pakistanse grens-aanval
2011-06-02 18:01
Islamabad – ‘n Militêre aanval op ‘n grenspos in Pakistan
en die nabygeleë dorpies langs die grens met Afganistan het minstens 81 lewens
geeis.
Die Shaltalo-grenspos in die Dir-distrik in Khyber
Pakhtunkhwa, ‘n provinsie in die noordweste van Pakistan, is Woensdag aangeval,
het Ghulam Mohammad, ‘n burgerlike leier van die distrik, gesê.
Nazir Khan, ‘n polisiebeampte by die distrikspolisie
se hoofkantoor, sê 35 sterftes is tot dusver bevestig.
“Onder hulle tel 27 polisiebeamptes en agt
burgerlikes,” het Khan gesê.
Khan het gesê dat die aanvallers militêre
uniforms aangehad het.
Mir Qasim, ook ‘n polisiebeampte, het gesê dat
46 Taliban-militante deur Pakistan se sekuriteitsmagte doodgemaak is.
“Sowat 200 tot 300 terroriste het deelgeneem
aan die aanval,” het Khan gesê.
“Dis nie moontlik om presies te weet hoeveel van
hulle dood is nie, aangesien hulle die lyke van hul kamerade saam met hulle
weggevat het toe hulle gevlug het,” het Khan verduidelik.
Hulle het in die rigting van Afganistan
gevlug.
Volg Nuus24 op Twitter.
- Sapa-DPA