7,2-naskok ruk Chili
2010-03-11 22:08
Santiago - Drie kragtige naskokke het Chili Donderdag geruk, met een wat 7,2 gemeet het.
Die naskokke het etlike minute voor die land se nuwe president, Sebastian Piñera, ingehuldig sou word, plaasgevind.
Die skuddings het paniek gesaai in die suide, waar 'n aardbewing met 'n grootte van 8,8 op 27 Februarie getref het.
'n Daaropvolgende tsoenami het honderde lewens geëis.
'n Tsoenami-waarskuwing is deur die Chileense vloot uitgereik, maar daar was geen onmiddellike berigte van skade of sterftes nie.
Die inhuldigingseremonie by die parlementsgeboue in Valparaiso sou volgens beplanning voortgaan.
- Sapa-AFP