5 vermis nadat skip sink naby Suid-Korea
2009-12-20 07:00
Seoel – Vyf bemanningslede, insluitend twee Indonesiërs, word vermis nadat ‘n Suid-Koreaanse vissersboot langs die suid-oostelike kus van die land gesink het.
Kuswag-amptenaar, Chung Hae-Jung, het gesê 25 mense was aan boord die 129 ton skip toe dit Sondagoggend ongeveer 69 km van Busan-hawe af gesink het.
Volgens haar word drie Suid-Koreaanse en twee Indonesiese bemanningslede vermis, terwyl 20 ander mense deur nabye skepe gered is.
Kuswag-skepe en ‘n helikopter soek in die gebied vir die vermisde bemanningslede, maar hoë branders bemoeilik dié taak.
Chung het gesê die Kuswag beplan om bemanningslede te ondervra om die oorsaak van die ongeluk te bepaal.
- Sapa