43 sterf toe bus in rivier val
2011-10-13 10:50
Katmandoe, Nepal – Minstens 43 mense is Donderdag dood toe ‘n bus van ‘n bergpad afgery het en in ‘n rivier in die ooste van Nepal beland het, het beamptes gesê.
Die bus het ‘n stuk onvoltooide pad verlaat en 300 m ver in die rivier geval, het Lokendra Shrestha, ‘n polisiebeampte in die Sindhuli-distrik, gesê.
“Altesaam 43 lyke is reeds uit die water gehaal en die bus is heeltemal verwoes. Dit is moontlik dat nog lyke naby die ongelukstoneel gekry kan word,” het Shrestha gesê.
‘n Groep van 11 mense wat op die dak van die bus gery het, het afgespring voor die bus in die Sunkoshi-rivier geval het.
Die beseerde passasiers is in 'n hospitaal opgeneem. Twee is in ‘n kritieke toestand.
– Volg Nuus24 op Twitter.
- AFP