40 sterf in aanvalle in Sirië

2012-09-24 19:03

Beiroet – Veertig mense is Maandag dood in Siriese lug- en granaataanvalle deur die regering op rebellegebiede.

Die aanvalle kom slegs ure voordat die vredesonderhandelaar Lakhdar Brahimi met die VN se sekuriteitsraad gaan praat oor gesprekke met pres. Bashar al-Assad en die opposisie.

Minstens 13 mense is in die noordelike stad Aleppo dood, het aktiviste gesê.

Beeldmateriaal is aanlyn gelaai van mans wat probeer om slagoffers onder die puin van twee geboue, wat deur lugaanvalle in die sentrale Maadi-streek vernietig is, uit te haal.

Drie kinders van een familie was onder die slagoffers in Maadi.

Regeringsmagte het rebellegebiede in die provinsie Homs, Idlib in die noorde, Daraa in die suide en op die buitewyke van Damaskus aangeval.

Troepe het ook met rebelle in die Kaboon-woonbuurt in die land se hoofstad geveg.

Die geweld kom kort voor ‘n vergadering wat Brahimi met die VN se sekuriteitsraad agter geslote deure sal hê oor gesprekke met al-Assad en die opposisie tydens ‘n besoek aan die Midde-Ooste.

– Volg Nuus24 op Twitter
 

- Sapa-DPA