40 beseer in gru-ongeluk in Engeland
2011-11-05 09:27
Londen – Sowat 40 mense is beseer en ‘n onbekende hoeveelheid mense is dood ná ‘n reuse-ongeluk op ‘n snelweg in Brittanje, het nooddienswerkers Saterdag gesê.
Ses-en-twintig motors was betrokke in die ongeluk op die M5 naby Taunton in Suidwes-Engeland en televisie-beeldmateriaal het gewys hoe ‘n string motors en vragmotors in vlamme op die snelweg staan.
Vragmotors wat in vlamme was het op hul sye gelê en mense het deure probeer oopkry om ander motoriste te probeer help ná die ongeluk wat in nat en mistige toestande gebeur het.
Ooggetuies het vertel hoe hulle ontploffings gehoor het en wrakstukke en beseerde mense op die pad sien lê het.
Tientalle brandbestryders het gewerk om mense wat in die wrakke van hul voertuie vasgekeer was te red. Die polisie het gesê ‘n lang stuk van die snelweg is gesluit en sal nie voor 24 uur weer oop wees nie.
Die polisie in Avon en Somerset het bevestig dat “sommige (mense) hul lewens verloor het,” maar hulle het nie ‘n getal bekendgemaak nie.
“Daar kan tot 40 mense wees wat beseer is en na hospitale geneem is. Dit is ‘n ernstige ongeluk,” het Paul Slaven van die Devon en Somerset brand-en-reddingsdiens aan BBC-televisie gesê.
Minstens 10 mense het kritieke beserings opgedoen.
Een van die motoriste, Paul O’Connor, het die toneel as “verskriklik” beskryf.
“Dit was verskriklik en ek het nog nooit so iets gesien nie – ek kon sien hoe mense langs die pad lê,” het hy aan Sky News-televisie gesê.
Jason Sharp, wat by ‘n nabygeleë rugbyklub was, het aan BBC gesê dat hy ‘n paar ontploffings gehoor het.
“Daar was talle swaar voertuie wat aan die brand was.”
Hy het bygevoeg dat daar digte mis was en dat die paaie nat was ten tyde van die ongeluk.
– Volg Nuus24 op Twitter
- Sapa - AFP