39 sterf in gru-aanvalle in Mexiko
2010-06-12 13:00
Ciudad Juarez – Minstens 39 mense is in die noorde van Mexiko dood nadat gewapende mans twee dorpe binnegevaar het, het die polisie Vrydag gesê.
In Chihuahua het meer as 30 gewapende mans oornag ‘n dwelm-rehabilitasiesentrum binnegestorm en19 mense doodgemaak en vier ander beseer.
‘n Onbekende getal gewapende mans het verder ook ‘n reeks aanvalle in Madero geloods, het die polisie gesê.
In Chihuahua het die mans Donderdag rondom middernag in ses vragmotors aangekom en die tweede verdieping van die Templo Cristiano Fe y Vida (Christian Faith and Life Tempel) binnegestorm.
Hulle het met groot kaliber wapens op die pasiënte en werknemers geskiet en 14 mense doodgemaak. Hulle het later nog vyf mense doodgeskiet en ‘n dreigboodskap nagelaat voordat hulle gevlug het.
Volgens inwoners wat langs die sentrum woon, het die aanval nie meer as 10 minute geduur nie.
Kort daarna het polisie en soldate die area omring en tevergeefs na die oortreders gesoek.
Ambulanse het die beseerdes, waarvan vier glo kritiek is, na plaaslike hospitale geneem.
Chihuahua is bekend vir dwelm-verwante misdaad en geweld en volgens amptenare word rehabilitasiesentrums gereeld die teikens van aanvalle as gevolg van kleinskaalse dwelmhandel of die teenwoordigheid van persone wat skuiling soek van die geweld of bendes.
In Madero het ‘n bende gewapende mans talle mense in minstens vyf dele van die stad doodgemaak.
Sover is “20 lyke al in verskeie dele van die stad gevind,” het ‘n polisie-beampte gesê.
Volg Nuus24 op Twitter
- AFP