37 dood ná swaar reën in Beijing
2012-07-23 12:16
Beijing – Inwoners van Beijing is woedend ná die ergste reën in 60 jaar die dood van minstens 37 mense veroorsaak het en nóg sewe mense vermis word.
Nege miljoen gebruikers van China se gewilde Sina Weibo-mikroblog het teen Maandagoggend hul woede uitgespreek oor onvoldoende waarskuwings van die vloede en die stad se verouderde dreineringstelsel.
“As die dreineringstelsel beter was, as daar betyds ‘n waarskuwing was en as mense beveel was om by die huis te bly, sou soveel mense hulle lewens verloor het?” het Bijiexiang, 'n gebruiker, gevra.
Altesaam 25 mense het tydens Saterdag se reën verdrink. Ses is dood toe huise inmekaar getuimel het, vyf mense is doodgeskok en een persoon is deur weerlig getref.
Die reën en vloede het $1,6 miljard (sowat R13 miljard) se skade veroorsaak, terwyl 66 000 mense hul huise moes ontruim, het plaaslike media berig.
Die water in die strate in die Chinese hoofstad, was tot 3 m diep. Altesaam 500 vlugte is gekanselleer en sowat 80 000 mense is gestrand gelaat.
– Volg Nuus24 op Twitter
- AFP
