33 kinders gered na Yanks hulle glo ontvoer
2010-02-02 08:32
Des Bouquets (Haïti). – Hulle vertrou nou geen grootmense nie en beskerm mekaar teen die wêreld.
Die 33 kinders wat gered is van ’n vermeende ontvoering deur Amerikaners het gister in ’n groepie by ’n weeshuis in Port-au-Prince, hoofstad van Haïti, gesit.
’n Eenjarige meisie, omring deur kinders van onderskeidelik vier, vyf en sewe jaar oud, het net gegluur na grootmense wat haar vra hoe dit gaan. Sy het aan die hand van haar maatjie van sowat vier jaar oud vasgeklou.
Die kinders is gered nadat hulle onwettig deur Amerikaners uit Haïti geneem is. Die Amerikaners het gesê hulle werk vir ’n liefdadigheidsorganisasie.
Patricia Vargas, streek-direkteur van die liefdadigheidsorganisasie SOS Children, het gesê sy het die kinders ontmoet toe hulle Saterdag uit die aangrensende Dominikaanse Republiek gebring is. Die meeste van hulle het familielede. “Van die ouer kinders het gesê hul ouers leef en sommige het adresse en telefoonnommers gegee.”
Vargas is hoof van SOS Children se dienste in Sentraal-Amerika, Mexiko en die Karibiese Eilande.
Die Haïtiaanse polisie het gesê hulle het vyf mans en vroue met Amerikaanse paspoorte en twee Haïtiane in hegtenis geneem toe hulle Vrydag laat probeer het om die grens met die Dominikaanse Republiek per bus oor te steek.
Marie Laurence Jocelyn Lassegue, Haïti se minister van kultuur en kommunikasie, het eergister gesê die kinders het geen dokumente gehad nie.
Die eenjarige meisie los nie haar maatjie se hand nie. Die ouer kinders maak beurte om haar te beskerm. Hulle tel haar op die skoot en deel drukkies uit.
“Dis ’n skok om te dink dat so iets kan gebeur ná die aardbewing,” het George Willeit, SOS-woordvoerder, gesê.
– Sapa-AFP