33 dood in Kenia ná oorvol bus omslaan
2013-02-27 15:30
Nairobi – Minstens 33 mense is dood en 49 is beseer toe ‘n oorvol bus omgeslaan het terwyl dit van Nairobi na Garissa in die noordooste van Kenia gery het, het beamptes Woensdag gesê.
Peter Outa, woordvoerder van die Rooi Kruis, het aan dpa gesê daar was meer as 80 mense op die bus wat ‘n wettige maksimum kapasiteit van 52 passasiers het.
Die bus het omstreeks 03:00 (00:00 GMT) naby Mwingi, sowat 180 km van Nairobi, omgeslaan.
Geen ander voertuie was in die ongeluk betrokke nie.
“Die pad is nie in ‘n slegte toetstand nie, so dit het of gejaag of die bestuurder het net sy konsentrasie verloor,” het Jared Ojuok, ‘n polisiewoordvoerder, gesê.
Volgens beamptes het dit ‘n hele ruk geneem om mense wat in die wrak vasgekeer was te red.
Twee mense is in ‘n koma en 17 is in ‘n kritieke toestand by nabygeleë hospitale, het nooddienswerkers gesê.
– Volg Nuus24 op Twitter
- Sapa-DPA
