19 sterf in lugballon-tragedie in Egipte

2013-02-26 09:38

Kaïro – Altesaam 19 toeriste is dood toe ‘n lugballon wat oor die antieke Egiptiese stad Luxor gevlieg het, ontplof het, het sekuriteitsbeamptes gesê.

Die toeriste was onder meer van Hongkong, Japan, Frankryk en Brittanje.

“Negentien mense is dood,” het die beampte aan AFP gesê.

Die lugballon, wat 21 mense in gehad het, het op ‘n hoogte van 300 m oor Qurna, in Luxor se Wes-Bank, gevlieg toe dit aan die brand geslaan en toe ontplof het, het die beampte gesê.

Twee oorlewendes, onder wie die vlieënier, is na ‘n hospitaal geneem.

– Volg Nuus24 op Twitter

- AFP