17 Dood ná migranteboot omslaan
2012-02-06 18:55
Sabana De La Mar – Reddingswerkers langs die kus van die Dominikaanse Republiek het 17 lyke en 13 oorlewendes gevind nadat 'n oorvol boot met migrante amper twee dae gelede omgeslaan het, het beamptes gesê.
Die boot, wat 70 migrante vanaf die Dominikaanse Republiek na Puerto Rico vervoer het, het Saterdagoggend omgeslaan.
Reddingswerkers het gesê die kanse dat hulle nóg oorlewendes gaan vind, raak skraler. Die soektog na oorlewendes is laat Sondag afgelas nadat dit te donker geword het.
"Die see sal vanaf môre begin om die lyke terug te gee," het Jeffrey Pimentel, hoof van die brandweer by Sabana del Mar, sowat 150 km noordoos van Santo Domingo, gesê.
Luis Castro, intelligensie-direkteur van die Dominikaanse Vloot, het gesê die lyke van 12 mans en vyf vroue is gevind.
Dertien mense is gered, met die kaptein van die boot wat aangehou word.
Volgens Castro sal reddingspogings Maandagoggend hervat word. Hy het gesê dit is moeilik vir enigeen om vir twee dae op see te oorleef.
Die oorlewendes het vertel dat tientalle mense in die water geval het toe die boot, bekend as "yola," omgeslaan het. Die passasiers het na enigiets gegryp wat dalk kon help om hulle bo die water te hou.
Die onwettige migrante is almal Dominikane, maar owerhede het gesê daar mag dalk 'n paar Kubane of Haïtiane ook op die boot gewees het.
Puerto Rico is 'n algemene bestemming vir Dominikaanse migrante.
– Volg Nuus24 op Twitter.
- AP