150 000 Sterftes in Haïti bevestig
2010-01-24 20:39
Port-au-Prince – ’n Dodetal van 150 000 lewens in die Port-au-Prince metropolitaanse gebied weens die verwoestende aardbewing in Haïti is Sondag deur die minister van kommunikasie bevestig.
Daar is egter nog duisende onbevestigde sterftes oor die land wat onder puin begrawe is.
Marie-Laurence Jocelyn Lassegue het aan AP gesê die statistiek word gebaseer op die telling van liggame in die hoofstad en omliggende dele deur CNE, ’n staatsonderneming wat lyke verwyder en in massa grafte begrawe.
Dit sluit nie stede soos Jacmel in nie, waar duisende glo gesterf het, maar begrawe is.
’n Dodetal van sowat 200 000 mense word egter verwag, het die regering van Haïti gesê.
"Niemand weet hoeveel liggame steeds onder die puin begrawe is nie. Dit kan 200 000 tot 300 000 wees,” het Lassegue gesê.
Kenners het gesê die kanse is baie skraal dat daar nog enige lewendes gevind sal word.
-AFP