14 mans skuldig ná rooftog in Denemarke
2010-09-07 20:31
Kopenhagen, Denemarke - 'n Deense hof het 14 mans wat betrokke was in dié Skandinawiese land se grootste rooftog in 2008, skuldig bevind.
Die mans het volgens die hof 62 miljoen krone (sowat R72 miljoen) by 'n kontantdepot in Kopenhagen gesteel.
Die Glostrup-stadshof het die mans Dinsdag skuldig bevind op alle aanklagte, insluitend rooftog, brandstigting en die besit van vuurwapens.
Dit was nie onmiddellik duidelik of die verdagtes, wat Sweedse, Deense en Franse burgers is, teen die uitspraak gaan appelleer nie.
Die mans kan elk tot 15 jaar tronkstraf gevonnis word.
Op 10 Augustus 2008 het gemaskerde rowers met submasjiengewere by die kontantdepot in Glostrup ingestorm.
Hulle het 10 vragmotors aan die brand gesteek en metaalspykers op 'n nabye pad gesit om te verhoed dat hulle agternagesit word.
Niemand is beseer nie, en slegs 'n klein bedrag van die geld wat gesteel is, is teruggevind.
- AP