122 gestremdes deur terapeut mishandel
2011-02-01 23:00
Bern (Switserland) - ‘n 54-jarige man het erken hy het meer as 100 verstandelik gestremde kinders en volwassenes in sorgsentrums in Switserland en Duitsland seksueel mishandel oor byna drie dekades.
Die mishandeling het in nege verskillende sorgsentrums gebeur, waar die man, wie se naam nie bekendgemaak is nie, sedert 1982 as ‘n terapeut gewerk het, het die polisie in Bern, Switserland, gesê.
Die polisie het 122 van die slagoffers geïdentifiseer. Die jongste van dié slagoffers was slegs een jaar oud ten tyde van die misdaad.
Altesaam 42 van die slagoffers was ouer as 18.
Die man is in April 2010 in hegtenis geneem en is sedertdien in aanhouding, maar die owerhede het Dinsdag eers besonderhede van die saak bekend gemaak om te voorkom dat die ondersoek deur media-belangstelling gekniehalter word, het die polisie gesê.
Die hoof van die spesiale ondersoekeenheid van die polisie in Bern, Gabriele Berger, het gesê die getuienis teen die man sluit foto’s en ure se videomateriaal, waarop die mishandeling gesien kan word, in.
Sy sê hy het dikwels slagoffers gekies wat nie kan praat nie.
Die saak het in Maart aan die lig gekom toe twee manlike inwoners van ‘n sorgsentrum hul ouers ingelig het oor seksuele kontak met die terapeut.
- Volg Nuus24 op Twitter
- Sapa - AP