114-jarige is wêreld se oudste vrou
2013-02-27 17:00
Tokio – Misao Okawa, ‘n 114-jarige Japannees, is Woensdag deur Guinness World Records erken as die wêreld se oudste vrou.
Okawa, wat op 5 Maart 1898 gebore is, het minder as ‘n week voor haar 115de verjaardag ‘n sertifikaat van Guinness ontvang waar sy in ‘n tehuis in Osaka woon.
“Ek is bly,” was haar reaksie, het die Kyodo-nuusagentskap berig.
Okawa, wat nog nooit enige groot gesondheidsprobleme gehad het nie, het gesê die geheim van ‘n lang lewensduur is om goeie etes te hê.
Okawa, die dogter van ‘n winkeleienaar, het in 1919 getrou. Sy het drie kinders gehad, waaronder twee – ‘n seun en ‘n dogter – nog lewe en reeds in hul negentigs is, het Kyodo berig.
Die wêreld se oudste lewende mens in Jiroemon Kimura (115). Hy is op 19 April 1897 gebore.
– Volg Nuus24 op Twitter
- Sapa-DPA
