11 sterf in veerboot-ongeluk in China
2011-09-10 11:25
Beijing – Minstens elf mense, insluitende nege skoolkinders, is dood toe ‘n oorlaaide veerboot in ‘n rivier in die suide van Chine omgeslaan het, het berigte Saterdag gesê.
Volgens plaaslike amptenare was 45 mense, insluitende twee bemanningslede, aan boord toe die boot in ‘n kabel vasgehaak en omgekeer het, het CCTV berig.
Die Beijing News het getuies aangehaal wat gesê het daar was 92 skoolkinders op die veerboot en een blogger beweer dat daar meer as 63 lyke in die rivier was ná die voorval wat Vrydagmiddag plaasgevind het.
Volgens beamptes blyk dit of die boot oor ‘n kabel gevaar het wat gevolglik om ‘n propeller vasgedraai het.
Die ongeluk het op ‘n rivier in Shaoyang in die suidelike Hunan provinsie plaasgevind.
Drie mense was glo vermis, terwyl 16 beseer is en 13 het sonder beserings weggekom.
“Verskeie getuies het vertel dat 92 skoolkinders ten tyde van die ongeluk op die boot was,” het die Beijing News berig.
Volgens die berig het mense reeds begin om die slagoffers se lyke skoon te maak en papiergeld te brand – ‘n algemene offer wat gemaak word aan dooie mense in China.
“Dit was so vol ons kon nie lekker asemhaal nie,” het een oorlewende aan die koerant gesê. Sy het bygevoeg dat sy ‘n half verbleikte waarskuwing op die boot gesien het wat sê dit is slegs gelisensieer om 32 passasiers te vervoer.
Die Xinhua-nuusagentskap het berig dat die twee eienaars van die boot in hegtenis geneem is.
Volg Nuus24 op Twitter
- Sapa - AFP