11 dood ná kitsvloede in Indonesië

2012-11-09 08:20

Jakarta – Minstens 11 mense is dood en sewe word vermis ná kitsvloede 'n dorpie op Indonesië se Sulawesi-eiland getref het, het 'n amptenaar Vrydag gesê.

Twee dae van swaar reën in die Mamasa-distrik het 'n grondverskuiwing veroorsaak. Die grond het in 'n rivier beland, wat tot 'n kettingreaksie gelei het wat die kitsvloede veroorsaak het, het Roki Asikin, hoof van die nooddiensagentskap wat vir die reddingswerk verantwoordelik is, gesê.

Altesaam 11 volwassenes is Donderdag in die vloed dood en sewe mense word steeds vermis, insluitend vier kinders en 'n ses maande oue baba, het hy gesê.

Indonesië loop die laaste paar jaar gereeld onder kitsvloede deur. Omgewingsaktiviste blameer gereelde grondverskuiwings op onwettige ontbossing.

– Volg Nuus24 op Twitter.

- AFP