100 beseer deur vuurwerke
2011-12-26 07:43
Buenos Aires – Meer as 100 mense is na ‘n hospitaal in Argentinië se hoofstad geneem, met sommige wat ernstige brandwonde en oogbeserings opgedoen het, nadat hulle deur Kersfees-vuurwerke beseer is, het mediese beamptes Sondag gesê.
“Ons het ‘n toename van 20% sedert verlede jaar gehad, met 57 pasiënte wat opgeneem is met ernstige oogbeserings,” het Fernando Pellegrino, hoof van noodgevalle by Santa Lucia Ooghospitaal, gesê.
Die Buenos Aires Brandwond-hospitaal het 27 pasiënte behandel vir brandwonde wat hulle met vuurwerke en klappers opgedoen het. Inwoners vier Kersfees met die skiet van vuurwerke en klappers.
In die mees ernstige geval is ‘n agtjarige seun aan lewensondersteuningstoestelle gekoppel nadat hy 38% brandwonde oor sy liggaam opgedoen het.
Meer as 20 kinders, insluitende ‘n agt maande oue baba, tel onder dié wat beseer is.
- Volg Nuus24 op Twitter
- Sapa - AFP