1 500 toeriste ontruim weens brande in Kroasië
2012-07-23 22:50
Zagreb – Meer as 1 500 toeriste is Maandag ontruim en een brandbestryder is dood nadat verskeie veldbrande wat deur sterk winde aangewakker is op Kroasië se Adriatiese kus gewoed het.
“Die situasie is baie moeilik... ons doen alles moontlik om mense se lewens en eiendom te beskerm,” het die minister van binnelandse sake, Ranko Ostojic aan die kommersiële televisiestasie Nova gesê.
“Alles is gereed vir (verdere) ontruimings,” het die minister gesê.
Hy het die kusoord Selce besoek, wat naby is aan die noordelike hawe Rijeka, waar sowat 150 brandbestryders die vlamme onder beheer probeer bring.
Vroeër in die dag is ‘n 45-jarige brandbestryder dood terwyl hy ‘n ander brand, wat naby Moscenicka Draga op die Istria-skiereiland uitgebreek het, bestry het, het Slavko Gaus, ‘n brandweerbeampte, aan HRT-televisie gesê.
Die brand het omstreeks 06:40 GMT in Rijeka, sowat 180 km suidwes van Zagreb, uitgebreek en in die rigting van Selce versprei.
Sterk winde van meer as 100 km/h het brandbestryding baie moeilik gemaak, aangesien vliegtuie nie gebruik kon word nie en die brande buite beheer versprei het, het amptenare gesê.
In Selce is sowat 1 500 toeriste, meestal Slowene en Oostenrykers, van twee kampterreine ontruim, terwyl verskeie ander toeriste ‘n nabygeleë hotel verlaat het, het amptenare gesê.
– Volg Nuus24 op Twitter
- Sapa - AFP
