'1 000 potensiële terroriste in Duitsland'
2011-09-05 14:31
Berlyn – Daar woon nagenoeg 1 000 potensiële Islamitiese
terroriste in Duitsland, waarvan 128 in staat is om aanvalle uit te voer, het die
binnelandse minister, Hans-Peter Friedrich gesê.
“Ons het amper 1 000 mense wat as moontlike Islamitiese
terroriste beskryf kan word,” het hy aan die Bild-koerant gesê en bygevoeg 128
van dié mense word as “gevaarlik” en in staat daartoe om aanvalle uit te voer,
beskou.
Friedrich het gesê nagenoeg 20 van die potensiële terroriste
het opleidingskampe wat met terreurgroepe verbind word bygewoon en dat hierdie
individue deur die land se veiligheidsdienste dopgehou word.
Hy het bygevoeg dat hy nie dink ‘n herhaling van ‘n terreuraanval
op dieselfde skaal as dié op 11 September 2001 in New York is moontlik nie.
“Ons maak van ‘n wye verskeidenheid moderne sekerheidsmetodes
gebruik en ondersoek tans die hart van die ekstremistiese netwerke,” het Friedrich gesê.
Volgens hom het die Al-Kaïda-netwerk, wat vir die New
York-aanvalle verantwoordelik was, ‘n knou gekry met die dood van sy leier,
Osama bin Laden, maar is die organisasie steeds ‘n bedreiging.
Friedrich meen egter die grootste gevaar is individue wat op
hul eie werk omdat hulle moeiliker is om te identifiseer en vas te trek.
Die minster het verlede week na die opening van die verhoor
van die 21-jarige man van Kosovo gepraat, wat beweer hy het alleen onder die invloed van
Islamitiese propaganda gewerk toe hy twee Amerikaanse soldate vermoor het.
– Volg Nuus24 op
Twitter.
- SAPA