’n Helse rit, sê James Cameron
2012-03-28 09:00
Om na die diepste plek op aarde af te duik, is nie grappies nie.
Die regisseur James Cameron, wat Dinsdag die eerste mens geword het om alleen na die bodem van die Mariana-trog in die Stille Oseaan af te duik, het sy epiese duiktog as “’n helse rit” beskryf.
Die span wat Cameron gehelp het om sy gevorderde duikvaartuig, die Deepsea Challenger, te ontwerp, het die duiktog op hul webwerf (deepseachallenge.com) beskryf as “soos om in ’n baie beknopte hysbak van ’n warm tropiese reënwoud in die donker tot by die Noordpool af te sak”.
Om Cameron aan die lewe te hou, moes die Deepsea Challenger tydens dié duike duiseligwekkende drukkings van meer as 1000 atmosfere kon weerstaan.
Dit is omtrent gelykstaande aan die gewig van drie groot bakkie-voertuie wat op jou toon gebalanseer is.
Cameron het ná sy duiktog na ’n diepte van 10 898 m gesê die Deepsea Challenger het weens die ontsettende drukking met sowat 7 cm gekrimp teen die tyd dat dit die bodem gehaal het.
Dit het Cameron omtrent 2 uur en 36 minute gevat om op die bodem te kom, waarna hy sowat drie uur op die bodem rondbeweeg en die terrein verken het. Sy terugkeer na die wateroppervlak was volgens nationalgeographic.com vinniger as wat verwag is en het slegs 70 minute geneem.
Cameron se kajuit is so klein dat hy sy bene gebuig moet hou en nie sy arms of bene kan strek nie.
Al agt die duikboot se 3D- en HD-kameras is deur die Deepsea Challenge-span spesiaal vir die projek gebou en is elk ’n tiende so groot soos vorige soortgelyke diepsee-kameras.
Die duikboot se hidrouliese robot-arm het weens ’n lekplek tydens die duiktog onklaar geraak en hom verhinder om behoorlike rots- en afsakselmonsters op die bodem te versamel.
– Volg Nuus24 op Twitter
- Beeld
