Zuma prys 'ons eie' Charlize

2013-01-24 08:22

Johannesburg – Pres. Jacob Zuma het Woensdag die Suid-Afrikaans-gebore aktrise Charlize Theron geluk gewens nadat sy met die Wêreld- Ekonomiese Forum (WEF) se Kristaltoekenning vereer is vir haar humanitêre werk.

"Ons is trots op ons Charlize," het Zuma in 'n verklaring gesê.

"Sy het sukses behaal in 'n uiters mededingende omgewing, en is 'n sigbare en hardwerkende ambassadeur vir haar land."

Die Charlize Theron Africa Outreach Project finansier programme wat ontwerp is om die verspreiding van MIV onder jong Afrikane, veral in Suid-Afrika, te verhoed.

Die programme sluit in mobiele gesondheidsdienste in verarmde streke van Suid-Afrika.

Zuma het gesê hy het Theron Woensdag by die konferensie in Switserland ontmoet, waar sy hom van haar werk vertel het.

"Ek het haar verseker dat Suid-Afrikaners haar liefhet en die beste toewens. Ons wens haar alle sukses toe in elke taak wat sy onderneem."

Theron het Dinsdagaand die toekenning ontvang.

Die Suid-Afrikaanse sangeres Yvonne Chaka Chaka het verlede jaar die toekenning ontvang "omdat sy haar kuns gebruik om die stand van die wêreld te verbeter".
       
– Volg Nuus24 op Twitter

- SAPA