Woede oor MasterChef-wenner se restaurant

2012-07-27 11:00

Durban – Deena Naidoo, Suid-Afrika se eerste MasterChef-wenner, is ongelukkig omdat hy nie sy eie restaurant gaan kry nie, berig The Citizen.

Die promotors van die TV-program het sedert die begin van die reeks gesê die wenner sal wegstap met pryse ter waarde van R8 miljoen – insluitend "hul eie restaurant".

Naidoo is vandeesweek as wenner van die program aangewys.

Naidoo het gesê hy is nie die eienaar van die restaurant nie, en sal slegs die MondoVino-restaurant by Montecasino twee jaar lank bestuur. Hy sal slegs vyf keer 'n maand by die restaurant wees.

Hy sal 'n persentasie van die restaurant se winste ontvang en het gesê hy besit nie die titelaktes van die restaurant nie.

Die waarde van die pryse wat Naidoo ontvang het, beloop slegs sowat R1 miljoen – die restaurant uitgesluit.

Ingrid Engelbrecht van M-Net het ontken dat die indruk geskep is dat die wenner sy of haar eie restaurant sal kry.

"Toe daar aanvanklik oor die prys besluit is, het ons nie geweet wie die wenner gaan wees, waar hy gaan woon of wat sy persoonlike omstandighede gaan wees nie.

"M-Net en Tsogo Sun het verseker dat verskeie buigbare opsies oor die restaurant beskikbaar is vir die wenner."

– Lees meer hier

– Volg Nuus24 op Twitter