Withuis stil oor Beyonce-bohaai
2013-01-24 12:44
Washington – Die Withuis het Woensdag gesê dat vrae oor die sangeres Beyonce se weergawe van die volkslied by pres. Barack Obama se inhuldiging, nie beantwoord sal word nie.
Beyonce het dié lied glo nie regtig gesing nie, maar 'n opname gebruik en net gemaak of sy sing.
Verslaggewers het Woensdag by 'n inligtingsessie aan Jay Carney, die Withuis se woordvoerder, gevra of Obama geweet het dat Beyonce gemaak het of sy sing, en of die president omgee, het UPI.com berig.
“Ek het nie met hom daaroor gepraat nie,” het Carney gesê.
“Ek is bly julle ouens is gefokus op die belangrike kwessies van die dag,” het Carney sarkasties opgemerk.
“So magtig soos hierdie kantoor is, kan ons nie die weer beheer nie, en met die aantal kwessies wat ons te doen kry, moet ons besluit watter kwessies ons gaan hanteer, en watter nie. Hierdie is een van daardie kwessies.”
– Volg Nuus24 op Twitter
