William, Catherine moet reputasie van koninklikes red

2012-09-06 22:55

Los Angeles – Prins William en sy vrou, Catherine, Brittanje se hertog en hertogin van Cambridge, moet alles in hul vermoë doen om die reputasie van die koninklike familie 'n hupstoot te gee.

'n Skandaal het die afgelope paar weke om prins Harry se kop losgebars nadat naakfoto's van hom wat in 'n hotelkamer in Las Vegas kuier, uitgelek het.

Senior koninklikes is glo bekommerd oor die uitwerking wat dit op die koninklike familie se verhouding met die publiek en die wêreld kan hê.

Daar is egter nou besluit dat William en Catherine perfek is om dinge te verbeter.

Dié twee is die afgelope tyd gereeld by die 2012 Paralimpiese Spele gesien en gaan Singapoer later besoek as deel van 'n koninklike toer. 

"Die onus rus op William en Catherine om alles te doen om dinge te red omdat Harry se situasie vinnig in 'n krisis ontaard het," het 'n bron aan die Britse uitgawe van die tydskrif Grazia gesê.

– News.com.au.

– Volg Nuus24 op Twitter.