‘Wikus’ dalk in A-Team
2009-09-10 16:15
Kaapstad- Volgens gerugte word die ster van District 9, Sharlto Copley, oorweeg vir die rol van Howling Mad Murdock in Joe Carnahan se nuwe weergawe van The A-Team.
Copley, wat nog ‘n nuweling op die silwerdoek is, het fliekgangers wêreldwyd beïndruk met sy vertolking van die karakter, Wikus van der Merwe, in District 9.
Dié film is in Johannesburg geskiet en het ‘n rekordgetal persone in Amerika, Brittanje en Suid-Afrika na die teaters gelok.
Volgens Empire Online is die aanbod vir Copley se rol nog net in besprekingsfase. Ander bekendes wat ook oorweeg word vir die nuwe reeks is Liam Neeson as Colonel Hannibal Smith, Bradley Cooper as Templeton "Faceman" Peck, en Quinton "Rampage" Jackson as BA Baracus.
Die oorspronklike A-Team televisiereeks was veral bekend in die 80’s en die nuwe een beloof om nog beter te wees.
District 9 het tot dusver sowat R714m ingesamel en was die top film in sy openingsnaweek in Amerika, Australië, Rusland en Nieu-Seeland.
–Nuus24