'Whitney was vermoor' – ondersoekbeampte

2012-12-28 10:15

Londen – Whitney Houston was vermoor oor ongeveer R13,6 miljoen se dwelmskuld, het 'n privaat ondersoekbeampte van Hollywood beweer.

Volgens Paul Huebl is twee boewe na die hotel gestuur waar sy gesterf het om die skuld te vereffen en hy het beeldmateriaal van kringtelevisiekameras om dit te staaf.

Hy het gesê merke wat op die sangeres se liggaam gevind is, is dalk opgedoen terwyl sy haarself probeer verdedig het teen haar aanvallers.

Huebl het 'n dossier met inligting aan die FBI oorhandig met die hoop dat hulle 'n kriminele ondersoek in verband met Houston se dood sal doen.

Houston is op 11 Februarie in haar kamer in die Beverly Hilton-hotel dood gevind.

Huebl, 'n voormalige polisiebeampte van Chicago, sê hy het die ondersoek gedoen nadat hy deur 'n kliënt gehuur is wat nie die amptelike verslae oor Houston se dood geglo het nie. Hy wou nie sy kliënt se naam bekendmaak nie.

Die FBI en die Beverly Hills-polisie het nie kommentaar gelewer nie.

– Daily Mail.

– Volg Nuus24 op Twitter.