Whitney se ma vaar uit teen Bobby

2013-01-29 12:27

New York – Cissy Houston, ma van die ikoniese sangeres Whitney Houston, het in ‘n nuwe boek uitgevaar teen die oorlede sangeres se eks-man, Bobby Brown.

In Remembering Whitney skryf Cissy dat sy sedert die begin van Whitney se verhouding met Brown getwyfel het of hy die regte man vir haar was.

Sy skryf ook dat Whitney volgens haar nie dwelms sou gebruik as dit nie vir Brown was nie.

Brown en Houston het in 1992 getrou en is in 2007 geskei. Hulle het ‘n dogter, Bobbi Kristina (18).

Whitney is op 11 Februarie 2012 dood ná sy in ‘n bad in ‘n hotel verdrink het. ‘n Hartsiekte en kokaïen-gebruik was volgens ondersoekbeamptes bydraende faktore tydens haar dood.

Die boek word Dinsdag bekend gestel, twee weke voor die eerste herdenking van Whitney se dood.

– Volg Nuus24 op Twitter
 

- AP