Whitney Houston glo so 'arm soos 'n kerkmuis'
2012-01-24 14:35
Los Angeles – Whitney Houston is glo so arm soos ‘n kerkmuis.
Die 48-jarige sanger, wat in die verlede met 'n verslawing aan kokaïen gesukkel het, het glo al haar geld spandeer en word finansieel deur haar platemaatskappy, Arista, onderhou. Houston het 'n voorskot op haar volgende album ontvang.
“Whitney se fortuin het opgedroog. Groot name in die musiekbedryf ondersteun haar en haar platemaatskappy het vir haar ‘n voorskot op haar volgende album gegee, maar niemand weet wanneer dit vrygestel gaan word nie,” het ‘n bron aan RadarOnline.com gesê.
Whitney is glo in so ‘n groot penarie dat sy selfs klein lenings by vriende moes aangaan.
“Sy het iemand gebel om vir $100 (sowat R800) te vra. Dit is so hartseer. Sy moet soveel geld soos Mariah Carey hê en sy is bankrot,” het die bron gesê.
– Volg Nuus24 op Twitter
- BangShowBiz