Cage se swanger SA-vrou se 'hormone pla'
2011-07-08 12:15
Los Angeles – Nikki Williams, die Suid-Afrikaanse vrou van Weston Cage, die akteur Nicolas Cage se seun, het in 'n verklaring bevestig dat sy swanger is.
Sy het egter ook erken dat sy gedrink het terwyl sy bewus was van haar swangerskap.
Volgens die skinderwebwerf TMZ het Williams ‘n verklaring uitgereik en bevestig dat sy die aand voor haar en haar man se inhegenisname vir huishoudelike geweld, gedrink het.
“Ek het die aand voor die inhegtenisname gedrink. Ek dink my hormone het die oorhand gekry. Dit is die enigste tyd wat ek alkohol gedrink het sedert ek uitgevind het ek is swanger. Ek is spyt dat ek gedrink het.”
Williams het ook haar liefde vir haar man verklaar en gesê hulle sal mekaar nie voor 'n hof daag nie.
“Ons is besig om deur ons probleme te werk. Ons is baie lief vir mekaar.”
Cage het egter op sy Facebook-blad bekendgemaak dat hy van plan is om van Williams te skei.
Hy het Woensdag geskryf: “Ek het my besluit gemaak, ek gaan skei.”
Cage is Dinsdag op borgtog van $50 000 (sowat R340 000) vrygelaat, terwyl Williams Donderdag vrygelaat is.
– TMZ.
– Volg Nuus24 op Twitter.