Wat pomp, Steve?
2012-01-29 09:45
Johannesburg – Lirieke in ’n liedjie wat na die sanger Steve Hofmeyr verwys, het ’n Twitter-storm om die koppe van die zef rapgroep Die Antwoord en Jack Parow laat losbars.
Hoewel die liedjie, "Wat pomp", al twee jaar oud is, het Hofmeyr eergister eers getwiet: “Die Antwoord en Jack Parow beledig my êrens op hul CD. Ek weet nie hoekom nie.
“Enigiemand?”
Parow en Die Antwoord het die liedjie destyds saam opgeneem.
Parow rap in die liedjie: “Look at that lekker romantiese Afrikaans superster rapper... Lat die beat drop player. Die naam’s Jack Parow f*k Steve Hofmeyr. Wat Pomp Julle.”
Hofmeyr se aanhangers het baie vinnig op sy Twiet gereageer met steun en kritiek soos: “Hulle (Die Antwoord en Parow) is trash” en “Hulle soek aandag en ploeg met jou naam”.
Hofmeyr het in antwoord op sy ondersteuners geskryf: “Nee, ek het nie slapelose nagte nie. Maar baie vra my oor Die Antwoord en Parow. Ek werk aan ’n antwoord.”
Hofmeyr het wel in ’n vroeëre blog-inskrywing geskryf hoewel hip-hop nie sy ding is nie, vind hy aanklank by Parow en Die Antwoord.
Parow (sy regte naam is Zander Tyler) was gister verbaas toe Rapport hom van die Twitter-gesprek meedeel.
“Daai is ’n ou song, bra. Hoekom is daar nou ’n bohaai?
“Steve is ’n pimp. Hy het sy eie gat gegrawe.
“Hy is ’n rowwe man wat like van doppe kap en ’n klomp girls opchat.
“Ek kan nie help as hy só is nie,” het Parow gesê.
– Volg Nuus24 op Twitter.
- Rapport