Vuurwarm Sexpo laat die kwik styg
2010-11-26 06:43
Die Burger
Kaapstad - Of jy nou daar is om te kyk of om te koop, vanjaar se Sexpo het iets vir almal se smaak.
Dié jaarlikse vuurwarm uitstalling is terug in die Kaapstadse Internasionale Konferensiesentrum (Kiks).
Nuuskieriges het al voor die uitstalling Donderdagoggend geopen het, tougestaan.
Toe die deure om 11:00 oopmaak, het mense by die gebou ingestroom om die meer as 100 stalletjies te besoek.
Een van die mense waaraan besoekers hulle veral vergaap het, was mej. Naak Suid-Afrika, Rene Human (23). Terwyl sy heel op haar gemak oor haar “werk” gepraat het, het honderde mense om haar saamgedrom om haar van nader te bekyk.
“Dis alles natuurlik vir my. Ek is heel op my gemak om kaal voor mense te wees. Soms raak ek nog skaam, maar dis nie so erg soos aan die begin nie,” het sy aan Die Burger vertel.
Sy het gedink Kapenaars sou meer liberaal as Johannesburgers wees, maar het gevind dat dit nie so is nie.
“Kom ons kyk of hulle na die einde van die week se kant toe hul inhibisies verloor,” het sy geskerts.
’n Ander uitstaller, wat beslis meer vroue as mansaanhangers gister gekry het, was die skilder Pricasso.
Hy verf ’n portret van iemand binne minute sonder om ’n kwas te gebruik. Sy tegniek het heelwat omstanders laat bloos.
By sommige stalletjies sal besoekers ook inligtingoor gesonde en gebalanseerde leefstyle kan kry.
Die Sexpo duur tot Sondag en is Vrydag en Saterdag tot middernag oop.
Sondag sal die laaste vertonings tot 21:00 duur.
Kaartjies kan by Computicket of by die deur gekoop word. Die pryse wissel van R130 tot R220.
Volg Nuus24 op Twitter
- Die Burger