Vusi en Karen Zoid deel verhoog
2011-11-11 07:01
Kaapstad – Die Stem gaan hierdie naweek in Kaapstad gehoor word. En hy gaan die verhoog deel met nog ’n stem wat al ’n dekade lank met ’n passie rock.
Vusi Mahlasela en Karen Zoid het in September vanjaar saam in die Lyric-teater van Goldreef City opgetree. Die gehoor was gaande en die deur is oopgegooi vir verdere optredes.
Vrydag- en Saterdagaand tree hulle in die Fugard-teater in Distrik Ses op. Dan is hulle op 27 November in die somerprogram van die Oude Libertas-amfiteater in Stellenbosch.
“Die eerste keer het ek en Karen elkeen meer ons eie ding gedoen. Nou is dit meer van ’n samewerking; daar is baie musikale energie. Ek doen wel my solowerk, maar ek sing ook saam met haar,” vertel Mahlasela.
“Dis nogal moeilik vir my om iemand anders se liedjies te sing, maar ons boodskap is dieselfde, so dit maak dit makliker.”
Die tema van hul program is liefde, maar nie die romantiese soort nie.
“Ons wil hê die mense in die land moet mekaar liefhê, vir mekaar omgee, mekaar vergewe. Deur my loopbaan het ek gevra vir goedheid, empatie. Nou vra ek ook vir herverdeling. ’n Herverdeling van vaardighede, moraliteit en kennis. Mense wat dit het, moet dit met ander deel, anders gaan dit verlore.”
Mahlasela is pas terug van ’n toer saam met die folksanger Ray LaMontagne. Net voor dit het hy ’n week lank saam met met Paul Simon in New York opgetree en saam met die banjospeler Béla Fleck.
Sy jongste album, Say Africa, is in Amerika vervaardig deur die legendariese blues- en folkmusikant Taj Mahal in die Haunted Hollows-ateljee in Charlottesville.
Dit is die ateljee van Dave Matthews. Gewese Suid-Afrikaanse musikante wat nou in Amerika is, het meegewerk. Hulle is die trom- en perkussiespeler Ian Herman (Tananas), die baskitaarspeler Bakithi Kumalo (wat nou vir Paul Simon speel) and Mongezi Ntaka (’n kitaarspeler wat veral saam met Lucky Dube gespeel het).
Sy vorige album was Naledi Ya Tsela (2006) waarvoor hy in 2007 ’n Sama-toekenning ontvang het vir beste manlike kunstenaar.
Zoid het vanjaar haar dekade in die plaaslike musiekbedryf gevier met ’n toer genaamd Afrikaners is Plesierig.
Sy het ’n jaar gelede haar album Terms & Conditions uitgereik. Haar lys van vererings sluit in Sama-, Kanna- en SAUK-Geraas-toekennings.
Vir die konserte in die Fugard-teater, bespreek by Computicket of by 021 461 4554.
- Die Burger