Vuiste klap by Hollywood-aktrise se huis

2012-11-23 07:00

Los Angeles – Die aktrise Halle Berry se ekskêrel Gabriel Aubry is op aanklag van aanranding in hegtenis geneem nadat hy en die Oscar-bekroonde aktrise se verloofde, Olivier Martinez, glo in 'n geveg betrokke was.

Julie Boyer van die Los Angeles-polisiekantoor het gesê Aubry het Donderdag by Berry se huis aangekom en daar was berigte van aanranding.

Die polisie het gesê Aubry is beseer en na 'n hospitaal geneem.

Hy is later aangekla van aanranding en op borgtog van $20 000 (sowat R178 000) vrygelaat. Hy sal op 13 Desember in die hof verskyn.

Berry en Aubry is gewikkel in 'n toesigstryd oor hul jong dogter Nahla.

E-posse wat aan Berry se reklame-agent en Aubry se familie-prokureur gestuur is, is nie onmiddellik beantwoord nie.
      
– Volg Nuus24 op Twitter

- Sapa - AP