Vroue van Boer soek 'n vrou gee raad
2010-09-13 14:17
Kaapstad - Tickey het sy trouvrou gekry, maar Lynda en Alna, twee vorige deelnemers, is nou albei gelukkig in nuwe verhoudings weg van dié realiteitsprogram. Hulle deel hulle Boer soek 'n vrou-ervaringe.
Lynda Smuts (28) van Malmesbury, Boer soek 'n vrou 2
Toe en nou:
Die wynboer Pieter Hanekom van Franschhoek moes tussen Lynda en die blonde Ashley Pugh kies. Daar was meer as genoeg drama op die plaas. Die twee vroue het gereeld 'n uitval gehad en selfs op mekaar geskree. Pieter het toe vir Lynda laat gaan, maar deesdae is dié boetiek-eienaar dolgelukkig in 'n verhouding.
"Vanweë die invloed wat die reeks op my lewe gehad het, wil ek dié verhouding persoonlik hou," sê sy.
Raad vir die nuwe vroue:
Sy raai vroue aan om mooi te dink voordat hulle aan die reeks deelneem.
"Die impak van so 'n program is vir ewig. Mense gaan jou oordeel en bespreek. Wees opreg, maar hou maar die meeste van jou emosies en gevoelens vir jouself."
Lekker en sleg: Dit was vir haar moeilik dat haar ware karakter nie op TV uitgebeeld is nie. Baie gesprekke tydens die reeks is byvoorbeeld uit konteks aangehaal, voel sy. En dít kan 'n slegte indruk van jou skep. "As ek geweet het wat ek nou weet, sou ek nooit deelgeneem het nie. Kykers beoordeel jou op grond van wat hulle op TV sien."
Die mededinging om alleentyd met Pieter te kry was moeilik. "Daar was nie genoeg tyd om hom te leer ken nie." Maar die reeks het nie Lynda se siening oor verhoudings of die liefde verander nie. "Liefde bestaan en jy moet daaraan werk. Dit moet van albei kante af kom. 'n Verhouding het opdraandes, maar daarsonder het jy nie afdraandes nie."
Lees meer by Sarie.
- Sarie